मूल्य भारतभन्दा पनि कम सुबिधा सोचे भन्दा राम्रो ""आयो ""नेपाली बजारमा सामसुङ ग्यालेक्सी ग्रान्ड टु

२७ माघ, काठमाडौं । नेपाली स्मार्टफोन बजारमा ग्यालेक्सी ग्रान्डको अपार सफलतापछि सामसुङले अपग्रेडेड भर्सन ‘ग्रान्ड टु’ भित्राएको छ । नेपाली बजारमा ग्रान्ड टु ३६ हजार ९ सय रुपैयाँमा उपलब्ध छ ।
सामसुङ मोबाइलको नेपालका लागि आधिकारिक वितरक इन्टरनेशनल मार्केटिङ सर्भिसेज (आइएमएस)ले आइतबार साँझ एक समारोहको आयोजना गरी ग्रान्ड टु सार्वजनिक गर्‍यो ।
ठिक एक वर्ष अगाडि कम्पनीले सामसुङ ग्यालेक्सी ग्रान्ड नेपाल भित्राएको थियो । कम मूल्यमा ठूलो स्क्रीन भएको स्मार्टफोन ग्रान्ड एक वर्षकै अवधिमा ५५ हजार थान बिक्री भएको थियो । मध्यमवर्गीय उपभोक्ताहरुलाई लक्षित गरी बजारमा ल्याइएको ग्रान्ड टुले पनि राम्रो रेस्पोन्स पाउने आइएमएसका अध्यक्ष दीपक मलहोत्राले बताए ।

सुबिधा

ग्रान्ड टुमा ५.२५ इञ्चको ठूलो स्क्रीन रहेको छ । जसमा १६:९ को रिजोलुशन प्रयोग गरिएको छ । मल्टी विण्डोज सुविधा रहेको यसमा मल्टिटास्किङ सुविधा पनि उपलब्ध छ ।
यसमा १.२ गीगाहर्ज क्वाड कोर प्रोसेसर रहेको छ । २६०० एमएएच क्षमताको ब्याट्रीको प्रयोग गरिएको हुँदा १७ घण्टासम्म कुरा गर्न र १० घण्टासम्म गीत सुन्न सकिन्छ । स्मार्टफोनमा २ वटा सीम प्रयोग गर्न मिल्नुका साथै दुईवटा नेटवर्कबीच स्विच गर्न मिल्ने सुविधासमेत रहेको कम्पनीले जनाएको छ ।


ग्रान्ड टु मा ४.३ जेलीवीन अपरेटिङ सिष्टम रहेको छ । र्‍याम १.५ जीबी रहेको छ भने इन्टरनल मेमोरी ८ जीबी छ । प्रयोगकर्ताले ६४ जिबीसम्म एक्पाण्डेवल मेमोरी थप्न सक्छन् । स्मार्टफोनमा अगाडि १.९ मेगापिक्सल क्यामेरा र पछाडि ८ मेगापिक्सल क्यामेरा जडान गरिएको छ । क्यामेरामा भएको बेष्ट फेस, बेस्ट फोटो र कन्टिनियस शट विशेषताहरुले अरु मोबाइलभन्दा भिन्न बनाउने कम्पनीले दाबी गरेको छ ।

मूल्य भारतभन्दा पनि कम

बजारमा हुँदै आएको ग्रे मार्केटलाई निरुत्साहित गर्न कम मूल्य कायम गरिएको आइएमएस प्रेसीडेन्ट दीपक मलहोत्राले बताए । पछिल्लो समय बजारमा चोरीका मोबाइल सस्तो मूल्यमा खुलेआम बिक्री वितरण हुन थालेपछि मोबाइल आयातकर्ता कम्पनीहरु मर्कामा परेका छन् ।
‘यो मूल्य भारतमा भन्दा पनि कम हो’ मलहोत्राले भने-’मूल्यका कारण उपभोक्ताले अबैध तरिकाले भित्रिएका सेट प्रयोग नगरुन् भन्ने हाम्रो चाहना हो ।’





‘त्रिभुवन अन्तर्राष्ट्रिय विमानस्थलको तथ्याङ्क हेर्दा नेपालमा मासिक ४ लाख मोबाइल आयात भएको देखिन्छ’ दीपकले भने- ‘तर बजारमा मासिक ८ लाखभन्दा बढी मोबाइलहरु बिक्री भइरहेका छन् ।’ आधाभन्दा बढी मोबाइल चीन र भारतबाट चोर बाटो हुँदै आउने गरेको उनको गुनासो थियो ।
‘चोरीको सुन आउँदा सरकारले ठूलो नजर लगाउँछ, तर खुलेआम चोरीका मोबाइल बिक्री हुँदा वास्तै गर्दैन’ उनले भने- ‘सरकारले कि त चोरीका मोबाइल बिक्री गर्न पाइन्छ भनिदिनुपर्‍यो, कि त्यस्तो काम गर्नेहरुलाई कारबाही गर्नुपर्‍यो ।’

ग्रान्ड टु नेपाल ल्याउँदा एक वर्षमा ८० हजार बिक्री गर्ने लक्ष्य राखेकोमा ५० हजार थान बिक्री गर्न सफल भएको स्मरण गर्दै आईएमएसका प्रेसिडेन्ट दीकेश मलहोत्राले भने- ग्रान्ड टु एक वर्षमा एक लाख २० हजार थान बिक्री गर्ने लक्ष्य पुरा गर्छौं ।’

Labels: Technology