प्रहरीको आफ्नै 'स्टिङ अपरेसन', घूस खाएको भिडियो खिचेरै कारबाही
|
|
निवेदन दर्ता गर्ने सर्वसाधारणसँग एक सय रुपैयाँदेखि गाँजा तस्करसँग दुई लाख रुपैयाँसम्म घूस बुझेको भिडियो र अडियो प्रमाणका आधारमा कसैलाई थुनामा र कसैलाई निलम्बन गरेर कारबाही थालिएको प्रहरी महानिरीक्षकको सचिवालय स्रोतले बतायो।
आन्तरिक अपरेसनका क्रममा महोत्तरीका एसपी रामप्रसाद श्रेष्ठ पोलिएका छन् भने इलाका प्रहरी कार्यालय मनहरी मकवानपुरका इन्स्पेक्टर बालनरसिंह राणा क्षेत्रीय कार्यालयमा तानिएका छन्। राणाले गाँजा तस्करसँग पर्साको सीमासम्म पुर्याउन एकपल्टको पाँच लाख रुपैयाँका दरले घूस लिने गरेको अपरेसनका क्रममा पत्ता लागेको थियो।
सादा पोसाकमा काम गर्ने प्रहरी जवान विश्वनाथप्रसाद यादवलाई रंगेहात पक्राउ गरेपछि उनले राणाको आदेशमा काम गरेको बयान दिएका थिए। क्षेत्रीय प्रहरी प्रमुख डीआईजी प्रकाशकुमार अर्यालले 'स्टिङ अपरेसन' गरिएको र राणालाई पनि अनुसन्धानका लागि क्षेत्रीय कार्यालयमा हाजिर गराइएको जानकारी दिए।
गत फागुन मध्यदेखि चैतसम्म गरिएको अपरेसनमा २२ जना प्रहरी कर्मचारी घूस लिँदै गरेको अवस्थामा फन्दामा परेका थिए। जिल्ला प्रहरी कार्यालय महोत्तरीका प्रहरी जवान मुकेश यादव भारतको सिमानाबाट सादा पोसाकमा अवैध रूपमा तोरीको तेल, चिनीलगायतका सामान नेपाल भित्र्याउन तस्करसँग मिलेको अभियोगमा पक्राउ परेका छन्।
गत चैत ८ गते बिहान साढे नौ बजे स्टिङ अपरेसन गर्दा तस्करसँग एक हजार रुपैयाँ अग्रिम घूस लिँदै गरेको अवस्थामा फन्दामा परेका यादवले दिनभर उठाएको रकम जिल्ला प्रहरी प्रमुख एसपी श्रेष्ठलाई बुझाउने गरेको प्रहरी प्रतिवदेनमा उल्लेख छ। थप वास्तविकता पत्ता लगाउन यादवको पोलिग्राफ परीक्षण गरिएको थियो।
जिल्ला प्रहरी कार्यालय सर्लाहीका प्रहरी जवान उपेन्द्रप्रसाद यादव तस्करलाई सघाउँदासघाउँदै सोनवर्षा नाकाबाट पक्राउ परेका थिए। उनले रकम लिएको अडियो-भिडिओ रेकर्ड गरिएको थियो।
इलाका प्रहरी कार्यालय पिपरिया रौतहटमा कार्यरत दीपेन्द्र रामले आफ्नी पत्नी अरूबाट पिटिएको भन्दै किटानी जाहेरी दिन कार्यालय पुगेका व्यक्तिसँग निवेदन दर्ता शुल्क भन्दै पाँच सय रुपैयाँ लिएका थिए। पक्राउ परेपछि रामले कार्यालय प्रमुखको आदेशअनुसार पैसा उठाएको बयान दिएका छन्। उनले एक सय ५० रुपैयाँ निवेदन दर्ता र मान्छे पक्राउ गर्न जाँदाका लागि तेलको पैसा गरी पाँच सय लिने गरेको बताए।
न्याय माग्न जाने पीडितसँग पैसा उठाउनेमा इलाका प्रहरी कार्यालय महेन्द्र आदर्श बारा, प्रहरीचौकी रघुनाथपुर महोत्तरी, सीमा प्रहरी चौकी ठाडीझिन्जा धनुषा, इलाका प्रहरी कार्यालय गढैया सर्लाही, इलाका प्रहरी कार्यालय सन्तपुर रौतहट, प्रहरी चौकी बहुअर्वा सर्लाही, सीमा प्रहरीचौकी दुहबी धनुषा, इलाका प्रहरी लङ्डी पर्सा र प्रहरीचौकी आशावारी पर्साका प्रहरी पनि छन्।
यी प्रहरी कार्यालयबाट क्रमश: हबलदार धर्मप्रसाद काफ्ले, हबलदार रामनाथसाह गुप्ता, जवान रामलाल भगत माली, मनोजकुमार महतो, नवलकुमार यादव, धुरेन्द्र साह तेली, राजाराम साह, रामबाबु राउत कुर्मी र श्यामकिशोर पटेल पक्राउ परेका छन्। यीमध्ये केहीले कार्यालय प्रमुखको आदेशले रकम उठाएको बयान दिएका छन् भने केहीले सेवाग्राही आफैंले पैसा दिएको दाबी गरेका छन्।
प्रहरी प्रवक्ता एसएसपी गणेश केसीले अनुचित प्रलोभनमा पर्नेविरुद्ध मध्यक्षेत्रीय प्रहरीले स्टिङ अपरेसन गरेको बताए। उनले भने, 'यसमा दुई दर्जनभन्दा बढी परेका छन्। पोलिएकाहरूबारे थप खोजबिन गरिँदैछ।'
वीरगन्ज भन्सार कार्यालयबाट दुई सय मिटर उत्तरमा रहेको रजतजयन्ती चोकमा ड्युटीमा खटिएका बेला भारतबाट ठेलामा फलफूल ल्याउने गरिबलाई जबरजस्ती फसाएर रकम उठाउने प्रहरी सहायक निरीक्षक यमबहादुर विक फागुन ८ गते र नारायणबहादुर श्रेष्ठ चैत ७ गते प्रहरीकै क्यामरामा कैद भएर फन्दामा परेका थिए। यी दुवै निलम्बनमा परेका छन् भने सोही चोकमा फागुन ९ गते खटिएका प्रहरीले रिक्सामा ल्याइएका कपडाका साना व्यापारीसँग घूस लिएका थिए।
भिडियो प्रमाणसहित प्रहरी हबलदार शेरबहादुर बल, सुरेन्द्रप्रसाद यादव, लोकु श्रेष्ठ, शेरबहादुर थापा र जवान विनोदकुमार पटेल, दिनेश राय यादव, सोनालाला पटेल, प्रेम महतो नुनिया, सत्यनारायण मिश्र, रत्नबहादुर दंगाल, सञ्जितकुमार सिंह र कुपेन्द्र यादव पक्राउ परेका छन्।
क्षेत्रीय प्रहरी कार्यालय हेटौंडाका डीआईजी प्रकाशकुमार अर्यालले जनतालाई सेवा दिनुपर्नेमा उल्टै पीडा दिएको पाइएपछि गोप्य स्टिङ अपरेसन गरिएको बताए। उनले भने, 'दोषी पाइएकालाई निलम्बन गरी थप अनुसन्धान गरिँदैछ, यस क्रममा जुनसुकै दर्जाका दोषी पाइए पनि कारबाही गरिनेछ।'
|
|
0 comments
Post Your Comments :