National » हाम्रो संविधान सडकबाट : वैद्य

काठमाडौं, बैशाख १२ – नेकपा–माओवादीका अध्यक्ष मोहन बैद्यले दोस्रो संविधानसभाबाट प्रतिगामी संबिधान आउने बताउँदै आफूहरुले सडकबाट जनपक्षीय संबिधान ल्याउने चुनौति दिएका छन । एकीकृत नेकपा माओवादीका लागि संबिधानसभा परीक्षाको घडी रहेको बताउँदै उनले संबिधानसभाबाट आउने जनबिरोधी संबिधानका पक्षमा लाग्ने कि त्यसलाई स्वीकार्ने भन्ने अवस्था आउन सक्ने बताए । हामी सहमतिबाट नै निकास निकाल्ने पक्षमा छौं । त्यसैले हामी पर्ख र हेरको अवस्थामा छौ । हामीलाई पेल्दै गएमा हामी संघर्षमा उत्रन्छौं,माओवादीको काठमाडौं जिल्ला अधिवेशनको बिहीबार कीर्तिपुरमा उद्घाटन गर्दै अध्यक्ष बैद्यले भने, जनताको हक अधिकार प्राप्तिका लागि पार्टीलाई एकताबद्व गर्दै अन्य देशभक्त पक्षधर शक्तिहरुसँग कार्यगत एकता गरे हामी संघर्ष अगाडि बढाउँछौं । विगतका सहमति र शान्ति सम्झौता विपरित द्वन्दकालीन मुद्दा बिउँझाएर आफूहरुलाई तर्साउन खोजेको आरोप लगाउँदै त्यस्ता हर्कतहरु नरोकिएमा जनसत्ता र जनअदालत पुनस्थापित गरेर आफूहरुले मुद्दा चलाउने पनि उनले बताए । बैद्यले भने, जनताको हक अधिकार प्राप्तिका लागि दस बर्षे जनयुद्धमा टाउकोमा कफन बाँधेर लडेको मान्छे भएकोले जनबिरोधी हर्कतका बिरुद्ध हामी अन्तिमसम्म संघर्ष गर्छौं । कसैका सामू झुक्दैनौ । माओवादी सचिव नेत्रबिक्रम चन्दले काँग्रेस एमालेलाई धोकेबाजको संज्ञा दिदै उनीहरुलाई आफूहरुले ठेगान लगाईदिने चेतावनी दिए । ज्ञानेन्द्रले जेल नेल हाल्न थालेपछि अत्तालिएर हामीसँग सहयोगको याचना गरेर रुने दलहरु अहिले जनयुद्वकालीन मुद्दा उदीनेर हामीलाई खेदन उद्धत छन । त्यस्ता धोकेबाजहरुलाई ठेगान लगाउन हामी सक्षम छौं । चन्दले भने,बिदेशीको उक्साहटमा माओवादीलाई दमन गर्ने जनबिरोधीहरुले उज्यालोमा हिडने सपना नदेखुन । क्रान्तिका लागि हामी जस्तो सुकै मूल्य चुकाएर कदम चाल्न तयार छौं । उपाध्यक्ष सीपी गजुरेलले बिश्वास र आशाका साथ हेरिएका जनयुद्वका नेताहरुले नै धोका र बिश्वासघात गर्दा क्रान्ति क्रान्ति गतिहिन बन्न पुगेको बताए ।

0 comments

Post Your Comments :