National » मुख्यसचिव पौड्याल बागमतीमा नुहाए

काठमाडौं, बैसाख, २ – मुख्यसचिव लीलामणि पौड्यालसहित एक सयभन्दा बढीले सोमबार बागमतीमा नुहाएका छन् । बागमती बदल्ने महाअभियान एक वर्ष पुगेको अवसरमा नुहाउने कार्यक्रम आयोजना गरिएको हो । बागमतीप्रेमीहरू बिहानै गुह्येश्वरी किनारामा भेला भएका थिए । कार्यक्रमस्थलमा माइकबाट स्वस्तिवाचन र शंखध्वनि गुञ्जिरहेको थियो । जगमा बागमतीको पानी उघाएर पौड्यालले भने, ‘बागमतीकी जय ।’ उनले सूर्यलाई अर्घ दिएर स्नान गरे । साहित्यकार कमलमणि दीक्षितले पनि बागमतीमा नुहाए । ८५ वर्षीय उनले भने, ‘धेरै वर्षअघि नुहाएको थिएँ, आज नुहाउँदा धन्य भएँ ।’ सहरी विकास मन्त्रालयका सचिव किशोर थापा, महानगरपालिकाका कार्यकारी अधिकृत लक्ष्मण अर्याल, सम्पत्ति शुद्धीकरण अनुसन्धान विभागका महानिर्देशक चूडामणि शर्मा, प्रधानमन्त्री कार्यालयका सचिव कृष्णहरि बाँस्कोटा, पशुपति क्षेत्र विकास कोषका सदस्यसचिव गोविन्द टन्डनसहितले बागमतीमा डुबुल्की मारे । पौड्यालले भने, ‘नयाँ वर्षमा नयाँ सन्देश दिन सक्यौं, दुर्गन्धित बागमती सफा गरे नुहाउन पनि मिल्दोरहेछ भन्ने ।’ आगामी तीन महिनाभित्र मनोहरा दोभानसम्म नुहाउन सकिने बनाइने प्रतिबद्धता उनले जनाए । उनले भने, ‘खुसी त जीवनमा धेरैपटक भइयो तर यस्तो आनन्द पहिलोपटक पाएँ ।’

0 comments

Post Your Comments :