National » मार्ने थुनामा, 'मर्ने’ हिरासतमा !

ओखलढुंगा, वैशाख २ - एउटा पुरानो बलिउड चलचित्र छ, 'अन्धा कानुन' । त्यसमा नायक अमिताभ बच्चन मान्छे मारेको अभियोगमा थुनामा पर्छन् । सजाय भुक्तान गरिसकेपछि उनले मारेको भनिएको मान्छे ज्युँदै भेटिन्छ । सन् १९८३ को उक्त चलचित्रको कथासँग मेल खाने घटना यहाँको पलापु-८ मा भएको छ । एक वृद्ध ५ महिनादेखि बेपत्ता थिए । उनको हत्या गरेको अभियोगमा दुई महिनाअघि एकै परिवारका तीनजना पक्राउ परे । उनीहरूले आफूले मारेको बयानमा स्वीकारे पनि । जिल्ला अदालतले पुर्पक्षका लागि कारागार पठायो ।

तर मारिएको भनिएका ६० वर्षीय ज्ञानबहादुर माझी आइतबार सकुशल भेटिए । उनलाई अनुसन्धानका लागि प्रहरीले नियन्त्रणमा लिएको छ । गाउँलेले ज्ञानबहादुरलाई अचानक देखेपछि नवलपुरघाटमा समाती प्रहरीको जिम्मा लगाएका थिए । ज्ञानबहादुर स्थानीय विद्यालयको व्यवस्थापन समितिका पूर्वअध्यक्ष हुन् ।

'हत्या' को अभियोगमा थुनामा पर्नेहरू गाउँकै ५० वर्षीय चित्रबहादुर माझी, उनका छोराहरू २२ वर्षीय कमल र १८ वर्षीय सुरेन्द्र छन् । प्रहरीले उनीहरूलाई माघ २८ गते पक्राउ गरी ज्यान मुद्दा चलाएको थियो ।

'प्रहरीले कुटेर मरणासन्न बनाएपछि बाँचिन्छ कि भन्ने आसले अभियोग स्वीकारेका हौं,' चित्रबहादुरले भने, 'अदालतमा पनि नस्वीकारे घर गएपछि फेरि गाउँलेले कुट्छन् भन्ने डरले भन्यौं । तर हामीलाई फसाउनकै लागि यसो गरिएको रहेछ । हामी निर्दोष छौं ।'

ज्ञानबहादुरले भने आफूलाई घटनाबारे केही थाहा नभएको बताए । भारततिर घुमेर फर्किएको उनले प्रहरीसँग भने । अनुसन्धान गर्ने भन्दै केही दिनका लागि उनलाई भेट्न प्रहरीले रोक लगाएको छ । प्रमुख जिल्ला अधिकारी सूर्यबहादुर खत्रीले भने, 'अनुसन्धान भइरहेको छ, केही दिनमा सत्यतथ्य बाहिर ल्याउँछौं ।' हत्या भएका भनिएका व्यक्ति भेटिए पनि अभियुक्तलाई छाडिएको छैन । फैसला गरिनसकेको घटना भएकाले तत्काल छाड्न पुनरावेदनले मात्रै आदेश जारी गर्न सक्ने जिल्ला अदालतका स्रेस्तेदार धनबहादुर कार्कीले बताए ।

कसरी भयो घटना ?

कात्तिक १९ गते भाइटीकाको दिन नवलपुरघाट पुलमा चित्रबहादुरका छोरा कमलले कुदाएको मोटरसाइकलले ज्ञानबहादुरलाई ठक्कर दिएपछि विवाद भएको थियो । सोही दिनबाट ज्ञानबहादुर बेपत्ता थिए । उनलाई बेपत्ता बनाएको आशंकामा भतिजा भूपाल माझी र श्रीमती पञ्चमायाले प्रहरीमा जाहेरी दिए ।

सिन्धुलीको डुँडेभन्ज्याङ-६ निवासी ज्ञानबहादुरका भान्जा पर्ने नरबहादुर माझीले प्रहरीलाई मामालाई रामेछापको बेल्टारमा कात्तिक २० गते देखेको बताएका थिए । तर गाउँलेले चित्रबहादुरसहित तीनजनालाई पक्राउ गरी घटना स्वीकारेको भनेर जानकारी गराए । प्रहरीले घटनास्थलमा पुगेर सोधपुछ गर्दा पनि उनीहरूले अभियोग स्वीकारेका थिए । त्यसपछि प्रहरीले उनीहरूविरुद्ध ज्यान मुद्दा चलाएको हो । 'करकापमा पारेर प्रहरीले बाध्य बनाएको होइन,' अनुसन्धानमा संलग्न प्रहरी निरीक्षक भगिरथ रेग्मीले भने, 'प्रहरी र सरकारी वकिलको अगाडि नै ज्ञानबहादुरलाई लठ्ठीले कुटेर बाँधेर सुनकोसीमा फालेको बयान दिएका थिए ।' सुरुमा अपहरणमा परेको शंका गरिए पनि नभेटिएपछि घटना रहस्यमय बनेको थियो । प्रहरीले १० जनाभन्दा बढी व्यक्तिलाई पक्रँदै सोधपुछपछि छाडेको थियो ।

0 comments

Post Your Comments :