जबर्जस्ती बिहे गराइएकी किशोरीद्धारा श्रीमानको हत्या

चैत २८, एजेन्सी । अफ्रिकी मुलूक नाइजेरियामा बलपूर्वक बिहे गराइएकी १४ वर्षकी किशोरीले श्रीमान सहित चार जनाको हत्या गरेकी छन् ।

परिवारले दोब्बर भन्दा बढी उमेरको व्यक्ति संग जबर्जस्ती बिहे गराइदिएपछि असन्तुष्ट किशोरी वासिला उमारुले विष हालेको खाना खुवाएर श्रीमान उमारु सानी सहित ४ जनाको हत्या गरेकी हुन् । वासिलाको गएको हप्ता मात्रै ३५ वर्षका सानीसंग बिहे भएको थियो ।

विष खाएर गम्भीर बनेका १० जनाको उपचार भइरहेको बिबिसीले जनाएको छ । उत्तरी कानो राज्यको उङ्गवार यान्सोरो गाउँमा सानीले बिहे भोज आयोजना गरेका बेला वासिलाले खानामा मूसा मार्ने विष मिसाएको स्वीकार गरेको स्थानीय प्रहरी अधिकारी मुसा मागाजी माजिआले बताएका छन् । प्रहरीसंगको बयानमा वासिलाले आफूले माया नगर्ने मान्छेसंग जबर्जस्ती बिहे गराएकाले हत्या गरेको बताएकी छन् ।

Labels: Interesting